Aktiwiteite

Hou die advertensiebord dop vir inligting oor begeleide 4×4-roetes in die Desembervakansie.

Meer as 12 bokspesies, wat kameelperde en sebras insluit, kom in die natuurreservaat se ongerepte bosse en klowe voor.

Bosbokstrand het sy eie klein biblioteek waar vakansiegangers boeke kan uitneem. Jy kan ook boeke skenk en ons help om ons aanbod uit te brei.

In die Desembervakansie word kerkdienste op Sondae, asook op Geloftedag en Kersdag gehou.

Toegang tot die tennisbaan is gratis. Bring eie tennisrakette en -balle saam.

Daar is ʼn vlugbalbaan met ʼn net. Bring net ʼn bal saam en hou die advertensiebord dop vir kennisgewings oor georganiseerde wedstryde tussen kampeerders en chaletbewoners, pa’s en seuns en Transvalers teen Kapenaars.

ʼn Kinder- en tienerprogram sal vanaf Desember 2023 in Desembervakansies aangebied word.

Kuier is deel van vakansiehou by Bosbokstrand. Hier in ons kampterrein het baie vakansiegangers oor die jare al familie geword.

By Bosbokstrand skud ons die stad se stof af, sit terug en ontspan. Hier kry jy letterlik rus vir jou siel.

Vir stappers is daar asemrowende staproetes wat deur ongerepte bosse en klowe loop. Jy kan ook 8km strandlangs na Haga Haga, of 9 km na Cintsa stap. Neem deel aan die jaarlikse Haga-Haga stap wat deur die vakansiegangers gereël word. Die volmaan strandstap is ook baie gewild indien die weer dit toelaat.

Bosbokstrand is ʼn voëlkykparadys met meer as 240 voëlspesies wat daar voorkom. Boskraaie, knysnaloeries, mahemme, lawaaimakerjanfrederikke, Natalse janfrederikke en ander bekende voëls van die Oos-Kaapse woude word  gereeld gesien. Knysnaspegte en die gryskopspegte is gereelde kampbesoekers.
 

Klik hier vir ‘n voëllys wat julle kan waarneem op bosbokstrand

Bosbokstrand is ʼn hengelparadys en as jy ernstig is oor hengel, is dit net die plek vir jou. Hier kan hengelaars hengel in sy volle verskeidenheid geniet. Talle spesies kom voor wat meer as genoeg uitdaging vir die hengelaar bied.

“Bronze bream”, silwersteenbras (witbiskop), witsteenbras en kolstert kom tussen die rotse en by die riwwe voor. Hul grootte en smaak maak van die vis ʼn gesogte vangs. Wildeperd (oftewel “zebra”) byt wanneer die water naby die rotse lekker koud is. Dié vis is rats en sterk en dit verg vaardigheid en geduld om een van hulle in te katrol. Sandhaaie en kabeljou is volop net agter die branderlyn. Selfs sloephaaie (skerptand-hondhaaie) is een van die uitdagings vir Bosbokstrand-hengelaars omdat hulle daarvoor bekend is dat hulle sulke kwaai weerstand bied.

Ander spesies wat by Bosbokstrand voorkom, sluit in stompneus, heuningkoekpylsterte, pylstert, bulrog, galjoen, elf en janbruin, maar laasgenoemde word selde gevang.

As die vis gebyt het, is daar niks lekkerder as ʼn vissie op die kole nie.